أم الدنيا

اتولدت بالسلامة اهلا بيك ف ام الدنيا مبدأياً تنسى انك طفل او ليك حقوق عليا مش بتاكل لقمة وجوة بيت عاوز حاجة تانية ؟ اوعى تنسى انك تراب وان الدنيا فانية نخش ف مرحلة التعليم ونحل اول أزمة ١٨ سنة من عمرك ملهمش اي لزمة منظومة فاشلة كل همها تجيب فلوس بالمذاكرة مش هتنجح لازم تاخد دروس و بعد كل دة مستحيل تشوف وظيفة انزل دور واشتغل مش تكون عالة تقيلة ١٢ ساعة شغل والفلوس يدوب تكفي والشهادة لفها وحطها ف مكان يدفي عشان وظيفتك محجوزة لأبن انكل شادي خلصها ف قعدة مع رئيس البنك جوة النادي هوة بيقبض بالدولار وانت بتلملم ف الفكة انشف شوية وأجمد احنا لسا ف اول سكة