المرج الساعة ٨ واحنا اتنين تايهين خرجنا من المترو على سوق.. يا مي نزلنا فين؟ قالتلي بص انا مش شايفة اي محطة بنزين سألنا قالوا مش محتاجة تاكسي دي على بعد دقيقتين خدلكوا تكتك/ خدنا تكتك اسطوري بجناحين طلع الدائري مخالف وانا ورا نشفان وخايف وباقول لمي عادي ده بالنسبة لكل اللي شوفته في حياتي شيء وهايف وصلنا محطة البنزين يجي ٨ وخمسة تفتكري يا مي الميكروباص عدى ولا لسه؟ اتصل ما بيردش تتصل مابيردش كلمت الشركة/ اللي حجزنا فيها بردو مابتردش جابت مي السجاير وانا دخلت الحمام طلعت دخلت تاني طلعت دخلت تالت مانا اصلي وانا مسافر بيبقى هاين عليا اني ابات في الحمام يا مي الساعة كام؟ بقت ٨ وعشرة بترد عليا وهي بتدور على لوشن للبشرة بعد ما تغسل ايديها بتحتاج حاجة تطري قال يعني ناقصة طريان بس عشان ريقي هيجري المهم من هنا لهنا الميكروباص وصل انا عقلي لسه مش مصدق ان ده حصل كلها كام ساعة ونكون/ انا ومي فنويبع رتبنا نفسنا والميكروباص خلاص هيطلع انا وهي بنتكلم والركاب كلها بتسمع مافيش بنت غير مي ومعظمهم ناس كبار رحلة بدايتها تقلق بس خلينا نتفائل بس خلينا نستنى قبل ما ناخد قرار شغل التكييف .. مافيش تكييف/ واحنا في شهر ٨ هوبا هوبا نزلنا عالطريق وانتوا عارفين الدنيا مافيش امان يا ابن عمي صحيح الدنيا فانية اخر بار ده مالوش علاقة باي حاجة تانية لفينا لفينا كتير لفينا/ لفينا كتييير لفينا لفينا تاني لفينا تاني كتييير وحجزنا واحنا في الاوتوبيس كأن مالفناش كأن مافيش حاجة تزعل واحنا اصلاً مازعلناش وانا معاها ماحستش باي بملل عملنا في الطريق كل حاجة تتعمل اتكلمنا نمنا غنينا قرينا سقعنا من التكييف قفلناه فاتحرينا وصلنا نويبع تاني يوم السما صافية مافيش غيوم بالليل مي قالتلي بص لفوق في السما بصيت لقيت/ النجوم كبشة رمل واترما احنا في كوخ على البحر والمزيكا زي السحر انا ومي والدنيا مش هنا اخيراً انا ومي بقينا لوحدنا