الحياة لازم تستمر أكيد هاييجى يوم والوضع هايستقر هى دى الحكمة .. هو ده السر ربك هو العالم ايه اللى نافع وايه المضر اسمع يا صاحبى وافهم اللى بين السطور حاول انك تغير نظرتك للأمور لو فى يوم وقعت اياك تتعصب أو تثور قول الحمد لله حاول تكون صبور لو كان الفرح بيت والحزن كان قصور لو حسيت ان السعادة بينك وبينها سور خليك باصص لقدام اياك تعيش مكسور حاول تزين بيتك ... حاول تهد السور لو كنت واقع فى بير حاول تقرب من ربك كتير هو الوحيد اللى بإيده المصير ومفيش حد غيره قادر على التغيير دى الحياة مش ناقصة تعقيد حاول مرة تانى وابدأ من جديد واحلم كتير أصل الحلم مش بعيد بابتسامة منك تقدر تكسر الجليد فى الذكريات أشباح مالماضى بتكتفك أفكار دمها تقيل بتحاول انها تضعفك اياك تستسلملها اوعى تخليها تحبطك هى شمعة مانطفتش لكن بتنور سكتك وعالعموم ..... مين فينا حاله بيدوم مين فينا عايش ملاك ومن الغلط معصوم لو فكرت كتير فى امبارح ممكن تغرق فى الهموم فكر دايما فى بكرة ولو وقعت لازم تقوم الإنسان الندمان ...... عايش دايما غلبان بيفوت فرصة ورا التانية وبيكون دايما خسران واللى الأمل مالى قلبه عايش دايما فرحان واثق انه هاييجى يوم والدنيا هاتاخده بالأحضان مين فينا ماجاش فى ساعة الجد وقام ناطط مالسفينة لما الشيطان ندهله سمعله وقالله يلا بينا مين فينا مابيغلطش مش هانضحك على بعضينا لازم الأمل دايما يفضل وسطينا