كلمات اغنية #بهرب <3 اشوفها بتولع بقى للكلام الجامد ده :D ــــــــــــــــــــــــــــــــــــــــــــــــــــــــــــــــــــــــــــــــــ بهرب م الكلام و استخبى فى السكوت مبحبش الحياه لكنى خايف إنى أموت مفيش حاجه مدايقانى و برضوا مش مبسوط الكفتين فاضيين طب ليه الميزان مهوش مظبوط ــــــــــــــــــــــــــــــــــــــــــــــــــــــــــــــــــــــــــــــــــ عمرك هربت منك فيك من حلمك ليراظيك من نفسك لما تتحكم فا تخاف إنها تآذيك من عيون الناس حواليك من ناس متعرفكش بتكره ناس تانيه فيك من حظك القليل من كرفك إللى ميل من معاملة أهلك ليك عشان شايفينك عيل من ذنب إنت إرتكبته من خير إنت إفتقدته من قلب بجد حب و بكل برود حرقته من حقود بيقول يا بخته من صبر صبره راح صوت الحق اللى مش مرتاح من ضمير مبيآنبش حد و كل شئ مباح من زحمة الأفكار من طيبة الأشرار من كف يضرب كف ميسآقفش بس يطلع نار كلام كتير بيوجع نصيحه مش بتنفع من إحساسى بكل حاجه راحت يوم و نفسى ترجع من عين مبتدمعش و قلب مبيخشعش من خوفك من أخرتك لكن عن ذنبك مبترجعش ــــــــــــــــــــــــــــــــــــــــــــــــــــــــــــــــــــــــــــــــــ بهرب م الكلام و استخبى فى السكوت مبحبش الحياه لكنى خايف إنى أموت مفيش حاجه مدايقانى و برضوا مش مبسوط الكفتين فاضيين طب ليه الميزان مهوش مظبوط ــــــــــــــــــــــــــــــــــــــــــــــــــــــــــــــــــــــــــــــــــ بهرب من كل خوف بهرب من الظروف بهرب من الحقيقه بمنع نفسى من إنى أشوف الظلم وسط البشر الكره نبتت شجر حاجات كتير متتوصفش أحوال تبكى الحجر من رجل عالحرام بتسعى و إيد إتمدت من كل حته بيضا بتختفى من دنيا إسودت طريق مبينورش ألغاز متتفسرش إدمان ميتبطلش من صحاب مبتقدرش م الذل و الإهانه م الكدب و الخيانه من ناس بتنهش لحم بعض مع إنها شبعانه من كل ماسك على كل وش من كل إنسان فى الأصل غير من كل زيف من كل غش من كل المناعين للخير من وقفة المرايه علشان بشوف الفشل بشوقنى من جوايا إنسان ضعيف معندوش آمل بهرب من كل حاجه للأكيد من المحتمل و بفشل أهرب م الواقع من هم تقل الجبل ــــــــــــــــــــــــــــــــــــــــــــــــــــــــــــــــــــــــــــــــــ بهرب م الكلام و استخبى فى السكوت مبحبش الحياه لكنى خايف إنى أموت مفيش حاجه مدايقانى و برضوا مش مبسوط الكفتين فاضيين طب ليه الميزان مهوش مظبوط