(بلد الغبش) آه ياطيور يا الراحله لي بلد الغبش شيلينى فى خاطرك نغيم كان القى ليا هناك عش انا ذكرة الناس الحنان تلفاني فى نومة الدغش ***** وارجع معاك انا ياطيور .. خلف الزمن كمين سنه اتمد فى امل الوصال .. وارحل مع سرب المنى وانزل هناك انا فوق تقا .. واطاطتا يابسي مشققه كانت مسقيه بالغنا وليك ياطيور كانت وطن كانت رخا وخيرا دنا *** اطرا البلد ناس البلد .. ليل البلد وصبح البلد ولو عارفه يا الفارده الجناح انا فيا شوق ماليهو حد للنيمه والضل الرهين.. والنسمه والسعن والبرد للوبي فى صدر الجروف .. والنيل من الحيضان شرد لى يابا فوق برش الصلاه .. فرش طرف توبو ورقد لى موكب الغيد العصير .. قاصد سبيل الخير ورد لى لحظه من عمر الزمان لا حسره لا هم لا حرد تلقانا موقدين اللهب وآمالنا فى بطن الترد وياحليل زمانك يابلد *** وياحليلا وكتين الشمش كانت دميعه علي الافق ومن الافق دارت تمش تتوارا في توب الغروب والدنيا حرا حر شتا والفرحه من درب الترك لفت يمين كل الدروب والحلي كانت صانه صن الا الهبوب .. وفي الشمال قلب نادت بنية بتها سنويه وبلا امر قالتلها شيلى الحليله ونادي خيك كان يجيك وشيلي الحليلي علي النعيجي الوالده ديك عشي البطان ولا تروحي من بطن البكان انا باقي عاد غردانه فيك ووكتين خالك دجانه يصد من الشرق قوليلو شوف العداد والتلاجت في الديوان وقوليلو في الكراب هناك باقي الحريجل والبخور ***** وعند الدغيش **** وآه يا طيور . ** وآآه يا طيور واشوقى انا .. انا ياطيور مشتاق كتير ما لى جناح متلك انا . و لى جناح انا كت بطير وانزل قصاد بير الفريق .. لى شوفة الواردات عصير امسك دلو الرايقه واجر .. املالا وابراهن غفير لامن خلاص هن يوصلن .. وانا تانى اواصل للمسير واوصل هناك حد الترب .. واقعد قصاد جدى الكبير واضحك من الشبه الشديد .. بين حظى والليل والمصير واتذكر الزمن البعيد .. وكتين ابوى الحاج سعيد يقلعلو فى رمتايي كان.. قايمالها فى حوضا جديد آآه ياطيور